Mazuz d ijen wdrar zeg idurar n Arrif:
Idvaren deg waman,
Azedjif deg wjenna.
Tighardvin iriwint,
Iri nnes d azeyrar.
Ighezdvisen qquren,
Ifadden d imeghta;
Aghembub nnes di tfuct:
Tiri war xafs ca.
***
Mazuz d ijen wdrar,
Di tmurt nnes yewta,
War yessin amuttvi,
War iteggêd, war itider.
Imara yessudv d wadvu,
War zzays itiwi ca:
Iticca s idmaren nnes,
Itarra t’ mays d yusa:
War itider, war ixennes,
War yeddikkîr ghar deffar.
***
Izzvifen n uMazuz zeg ineppimen n wajjaj,
Awaren n uMazuz zeg wadvu deg ifran,
Xminni yessawar, d tamurt i yessawaren.
***
Irs nnes war yemsebdvi,
Incucen war tnedrifen.
Awar nnes yefra,
War yennidv, war yarriz.
Iteffegh d zeg idmaren yarghin s tudart;
S warcti n tidet yetwagw wawar nnes.
S wntun n arrimet tinbiyen wawaren:
Tarzvigen nigh tizvidven - oemmars war temsisen.
***
Awaren n uMazuz dduqzen d zeg ydmrawen,
Amacnaw tariwin, amacnaw inssisen.
War djin d arettvar,
War djin d imarwasen,
Usin d zeg idv nnat-
Idv nnat i yigwjen;
Qqimen taryen-ttvaren jar tiziwin d ighzran,
Jar imawen d izilalen,
Jar imura d isummar.
***
Zzaysen i yessiwer Btulimius d Abuli,
Zzaysen i yesmun uMasin iryazen,
Zzaysen i mmenghen tarwa nnes d wayyawen,
Zzaysen i yekkûr Yughurtva Irumiyyen,
Zzaysen i yezzenz Bukkuc advekkûr,
Zzaysen i ybarreh Ziri d Yeghmurasen,
Zzaysen i itizzvif Tjedjit n Wdrar:
Ffghem a yeryazen!
Mmtem x tmurt nwem, imara txsem ad teddarem!
Zzaysen i ssiwren ijedjad,
Aked waydud n imazighen;
Ssiryen tigelditin,
Nnan: ssa i nedja!
***
Ffghend zi tmijja n Wmghar Muhand Amezyan,
Deg wass n Tmzida, s tmulla tudumen :
« Wen yexsen ad yeddar, yeffegh – war xafs ca !
Wen yexsen ad yemmet d amjaped, ibed da ! »
***
Ghar Tasirt n Wghbal, umi yesmun tiqebbal,
Zzasen i yessiwer Mmis n Oebd Krim:
Kkrem a yeryazen ad tewtem x ucar nwem!
War tedji d tudart, tudart s wadday nsen!
Zzaysen i ysghuy Muha u Hemmu n Zvayan:
Imazighen n Watvlas beddem xf idvaren nwem!
Afransis yir ad yawi lalla tamurt nnegh!
***
Zzaysen i yemmudv izran nnes Umedyaz,
Zzaysen i turja tahenjirt ahenjir,
Daysen i tessyem yemmas, mmis ar d yemghar,
Teggas «pella raru» di tbambast n tajerst,
Tessecna s ghar ujenna itran d taziri:
«Sst a mmi, sst a yedji,
Babam war da yedji!
Yezvwa yajemmadvin: war ssinegh min d gha yawi!»
***
Zzaysen i tettru tmghart aked tasirt;
Deg ur n tallest tettru -
Tettru x wxxam nnes:
«A yur inu mmi,
A wen ndvregh nnit,
Ksegh aryam n wûrgh,
Arrigh din tawaryit,
Ksegh aryam n ûrgh,
Arrigh din tawaryit…»
***
D nitni d awaren imezwura i zi ssiwregh:
Zzaysen i yarzugh x waman d wghrum,
D aysen i yenndref yirs inu x umzwar,
Remdegh ten aked ûmurdi d ticri d ubeddi.
Tesseyem ayi yemma xf tmuziqit nsen,
Xafsen i tettvsegh, zzaysen id tekkaregh.
Oemmars war tghiregh nitni d awaren!
War xafsen ssqsigh, war xafsen ssiwregh:
Man wen yetseqsan x ufus nnes nigh d idvaren?!
Am tazwut n tudart,
Di arrimet ttari-tettvar:
War xafs bu wawar, maca zzays i neddar!
***
Mazuz apya Mazuz a yamghar n Wdrar!
Swazzadvegh gharek: wca yi d afus nnec!
Itawi yi wannay, teggwdegh ad wdvigh;
Yeqdvu d ghari wazir, qedvwen d imerzva.
Tfawt texsi xafi, iweddver ayi wbrid;
Di tadjest steftufegh amacnaw advarghar:
Ad arnigh ghar zzat, nigh ad dewregh ghar deffar?!
Ghar tfiqqit d nec tmurudegh d amûrdi,
Teggwdegh xafs ad teghri, teggwdegh xafs ad texsi;
Ad fesyegh di tadjest, ad twaksegh war tirigh:
S wudem nnec a Mazuz i djigh, mara djigh.
***
Ttvef day a Mazuz, war day tejja ad wdvigh!
Susfay deg qemmum, atagh ad ggenfigh!
Ad yeggenfa yires,
War yetghimi yebdva!
Ad zzays inigh awaren ddaren d imizidven;
Ad cek zzay sen inigh i yin war cek yessinen:
Ad asen inigh: Mazuz yeddar,
War yedji wi t’ ghad yenghen.
Imara war t’ ttwirim,
D knniw d idvargharen!
Imar war s ttsrim,
Kenniw d idvardvuren!
Mimoun Amsbrid
