Mimoun Amsbrid

Mazuz

Mazuz d ijen wdrar zeg idurar n Arrif:

Idvaren deg waman,

Azedjif deg wjenna.

Tighardvin iriwint,

Iri nnes d azeyrar.

Ighezdvisen qquren,

Ifadden d imeghta;

Aghembub nnes di tfuct:

Tiri war xafs ca.

***

Mazuz d ijen wdrar,

Di tmurt nnes yewta,

War yessin amuttvi,

War iteggêd, war itider.

Imara yessudv d wadvu,

War zzays itiwi ca:

Iticca s idmaren nnes,

Itarra t’ mays d yusa:

War itider, war ixennes,

War yeddikkîr ghar deffar.

***

Izzvifen n uMazuz zeg ineppimen n wajjaj,

Awaren n uMazuz zeg wadvu deg ifran,

Xminni yessawar, d tamurt i yessawaren.

***

Irs nnes war yemsebdvi,

Incucen war tnedrifen.

Awar nnes yefra,

War yennidv, war yarriz.

Iteffegh d zeg idmaren yarghin s tudart;

S warcti n tidet yetwagw wawar nnes.

S wntun n arrimet tinbiyen wawaren:

Tarzvigen nigh tizvidven - oemmars war temsisen.

***

Awaren n uMazuz dduqzen d zeg ydmrawen,

Amacnaw tariwin, amacnaw inssisen.

War djin d arettvar,

War djin d imarwasen,

Usin d zeg idv nnat-

Idv nnat i yigwjen;

Qqimen taryen-ttvaren jar tiziwin d ighzran,

Jar imawen d izilalen,

Jar imura d isummar.

***

Zzaysen i yessiwer Btulimius d Abuli,

Zzaysen i yesmun uMasin iryazen,

Zzaysen i mmenghen tarwa nnes d wayyawen,

Zzaysen i yekkûr Yughurtva Irumiyyen,

Zzaysen i yezzenz Bukkuc advekkûr,

Zzaysen i ybarreh Ziri d Yeghmurasen,

Zzaysen i itizzvif Tjedjit n Wdrar:

Ffghem a yeryazen!

Mmtem x tmurt nwem, imara txsem ad teddarem!

Zzaysen i ssiwren ijedjad,

Aked waydud n imazighen;

Ssiryen tigelditin,

Nnan: ssa i nedja!

***

Ffghend zi tmijja n Wmghar Muhand Amezyan,

Deg wass n Tmzida, s tmulla tudumen :

« Wen yexsen ad yeddar, yeffegh – war xafs ca !

Wen yexsen ad yemmet d amjaped, ibed da ! »

***

Ghar Tasirt n Wghbal, umi yesmun tiqebbal,

Zzasen i yessiwer Mmis n Oebd Krim:

Kkrem a yeryazen ad tewtem x ucar nwem!

War tedji d tudart, tudart s wadday nsen!

Zzaysen i ysghuy Muha u Hemmu n Zvayan:

Imazighen n Watvlas beddem xf idvaren nwem!

Afransis yir ad yawi lalla tamurt nnegh!

***

Zzaysen i yemmudv izran nnes Umedyaz,

Zzaysen i turja tahenjirt ahenjir,

Daysen i tessyem yemmas, mmis ar d yemghar,

Teggas «pella raru» di tbambast n tajerst,

Tessecna s ghar ujenna itran d taziri:

«Sst a mmi, sst a yedji,

Babam war da yedji!

Yezvwa yajemmadvin: war ssinegh min d gha yawi!»

***

Zzaysen i tettru tmghart aked tasirt;

Deg ur n tallest tettru -

Tettru x wxxam nnes:

«A yur inu mmi,

A wen ndvregh nnit,

Ksegh aryam n wûrgh,

Arrigh din tawaryit,

Ksegh aryam n ûrgh,

Arrigh din tawaryit…»

***

D nitni d awaren imezwura i zi ssiwregh:

Zzaysen i yarzugh x waman d wghrum,

D aysen i yenndref yirs inu x umzwar,

Remdegh ten aked ûmurdi d ticri d ubeddi.

Tesseyem ayi yemma xf tmuziqit nsen,

Xafsen i tettvsegh, zzaysen id tekkaregh.

Oemmars war tghiregh nitni d awaren!

War xafsen ssqsigh, war xafsen ssiwregh:

Man wen yetseqsan x ufus nnes nigh d idvaren?!

Am tazwut n tudart,

Di arrimet ttari-tettvar:

War xafs bu wawar, maca zzays i neddar!

***

Mazuz apya Mazuz a yamghar n Wdrar!

Swazzadvegh gharek: wca yi d afus nnec!

Itawi yi wannay, teggwdegh ad wdvigh;

Yeqdvu d ghari wazir, qedvwen d imerzva.

Tfawt texsi xafi, iweddver ayi wbrid;

Di tadjest steftufegh amacnaw advarghar:

Ad arnigh ghar zzat, nigh ad dewregh ghar deffar?!

Ghar tfiqqit d nec tmurudegh d amûrdi,

Teggwdegh xafs ad teghri, teggwdegh xafs ad texsi;

Ad fesyegh di tadjest, ad twaksegh war tirigh:

S wudem nnec a Mazuz i djigh, mara djigh.

***

Ttvef day a Mazuz, war day tejja ad wdvigh!

Susfay deg qemmum, atagh ad ggenfigh!

Ad yeggenfa yires,

War yetghimi yebdva!

Ad zzays inigh awaren ddaren d imizidven;

Ad cek zzay sen inigh i yin war cek yessinen:

Ad asen inigh: Mazuz yeddar,

War yedji wi t’ ghad yenghen.

Imara war t’ ttwirim,

D knniw d idvargharen!

Imar war s ttsrim,

Kenniw d idvardvuren!


Mimoun Amsbrid
Paroles

Wen i yccin tiri nnes

War itzndir uyzzim,
Ur war ytgnfi...
Gguregh ghar tiwecca,
Tafegh din idvnnadvt.
Ayzzim inu ydder,
Itazzer s idammen;
Uhregh ssuysegh awaren,
Netta itadjdjegh, ytxûr!

Abrid inu ynnedv,
Wi d ayi t gha yuyuren?!
Ggurgh s timdffart,
Dat inu nec d deffar!

texsegh ad nnufsregh,
Nec arnnigh tighuniwin!
Carfegh ixf inu nnit,
Nigh twacarfegh?!

Ccigh tiri inu,
War ghari bu tfras,
Ussan teddaregh ten
Am xmi tarrigh amarwas.
Smunigh d iman inu,
Itagi ad ayi imun.
Tmudegh, ifssi…
War tznegfigh nec oemmars.

Ffghegh zeg ixf inu,
Msbdvigh x tisitin:
Ssffraghent tifras inu,
Nigh tarezzant ay d iftwizen;
Tarrant ayi war djigh d nec,
War djigh d wennidven.

D ayujir n yxf inu:
Arezzugh xafi war ay ufigh,
Tegwdegh ad jjumyegh,
Tegwdegh ad ggenfigh,
Tegwedegh ad nnamegh:
Aked wudmawen id ay ggin;
Ad jjegh tidet inu,
Ad zdghegh di tsunawin.



Yura t: Mimun Amsbrid (Biljika)
tawiza.net
Paroles

Thure'zzuth xf wawaren


Beddegh, arezzugh

Ggûregh, arezzugh

Qqimegh, arezzugh

Arezzugh x ca n wawaren

Izidven d imighisen

Ca n wawaren, xmi nni ten tafegh

Yetmarni dayi wzyen

Teksen ca x wur inu

Sruqqan ay tifawin

Itmeysi ufud inu

Tacigh ak (d) yex inu twaysigh d takessit.


Awaren yarezzvmen tawwurt n ujenna

Ssefsayen imunas, teksen tighufawin

Ghettvren ifuray

Ssiriwen tudart.


Awaren nni djan, zeg ami yedja yires

Maca ar d adfen deg izri,

I ghad irin s tidett:

Iticc asen tfawt

Itegg asen tiri

Ddakkûren d arrimet

Xafs azzvri, xafs tcuni.


Awar war yedji d awar huma yedwer d arrimet

Ar tafed ghares addud

Ad afed ghares tiriwet.


I yizri minzi yedja?

I yizri min zi ytiri?

Xmi nni itemsagar wawar aked uyezzim

Teksen aya d wgya,

Ad tafed war temsebdvin

Ddakkûren d ijjen:

D ayezzim yessawren

Nigh d awaren iyezmen.



Yura t: Mimun Amsbrid (Biljika)
(Tawiza.net)
Paroles

Ixfawen n umazigh


Ijjen yixef:

Taddarin twettvant,

Igermamen teqquren,

Izveghran nnegh tazghen,

Ijdvidven tgujen,

Imughar tmettan,

Nigh s tewsar tbupruyen?



Mana wya?!

Mana wkud a i di d usigh!?

Usigh d ad ddaregh?

Nigh ad nedvregh tudart?!

Razv yekk d ssa,

Kkin ssa imenghan?

Maca war ggin min ggin isuggusa yad!

Iwdveghd aked ughelluy :

Ma ad ghelyegh, ma ad uyuregh ?



Ixef nnidven:

Ur tmettigh ca!

Ad uyuregh!

Ad uyuregh maca ad d dewregh!

Ad uyuregh huma ad d dewregh!

U waxxa war d dwiregh, ad ddaregh.

Ad ddaregh mani nnidven,

S ughir, s uxeyyeq, s imettvawen?

Maca ad ddaregh.



Ad ddaregh x wedwar,

Xf tirja n wedwar.

U imara war d dwiregh?

Ad sdewregh!



Ad d dewregh!

Ad awyegh aman zi manis ur llin,

Ad carzegh iyyran nnegh,

Ad zzvugh azemmur,

ad zzvugh tasrighwa,

Ad farsegh urtan nnegh,

Ad zbaregh tazayart,

Ad ysigh car i tzeghwin,

Ad ssarghegh tfawt,

Ad tagh ixxamen.



Ad uyuregh!

Ad uyuregh? maca ad d dewregh!

Ad awyegh d tfawt,

Ad azzregh x tillas nni da izedghen,

Ad arwren ibexcac n tallest,

Ad fardvegh ixemrawen,

Ad ssighegh timessi di ycuman n ixarriqen,

Ad tedduqqes tidet: d attvas urid d icten.

Ad nnurzment tittvawin x tmurt, xf ujenna,

Xf yilel, x wazvri, x tcuni,

Xef tudart ? da: urid mani nnidven.



Ad d dewregh!

Uyuregh? maca ad d dewregh.

Ad henncegh andver n baba,

Ad xaf s ksegh asennan.

At? hdvigh zeg ussan,

Ad arcmegh di tudart, di tmektit n yewdan:

War yetwikkes, war yetwattu,

War yeddikk?r d car.



Ad d dewregh!

Uyuregh? maca ad d dewregh.

Ad kidi awyegh tira,

Ad zzaysent negg min war neggi:

Ad zzaysent necref awaren nnegh - war ttviwen,

Ad arrigh ismawen n yiyyran d ighezran,

Tiziwin d idurar, tisuwwa d tiyusar?

Ad ten arrigh amen d usin xf yires n yemma:

War twiffzven, war tefrighen,

War ten ucaren warsawen n yina d yinin.

Ad inigh ixf inu s wawaren n tmurt:

Imara nitni udrusen,

Aya zeg wya ad ten d ssarwegh:

Amen itemsarraw imendi, temsarrawen yeynidven.



Ad d dewregh!

Uyuregh? maca ad d dewregh!

Imara war d dwiregh, ad fesyegh d awaren,

Ad ten yeysi wadvu, ad ghemyen da, dipa,

Waxxa acar d amessas,

Xaxxa tafuct d tasemmadvt.

Xaxxa d gha ghemyegh d asennan n ntzeggert.


Yura t: Mimun amsbrid (Biljika)
Paroles

Arzzugh ij n yizri

Arzzugh ij n yizri
Ad yqdvu isghwan.

Arzzugh ij n yzri
Ad ay yssiri ghar ytran.

Ad ay yssemsagar aked tfuct,
Ad ay yssfsi deg wcar;
Ad ay ysmun aked yxf inu:
Iymeren ad wdvan.

Izri n tmzwura:
N tfawt d waman;
Ad ay yssird, ad ay ysrir
Zeg injan n wussan.

Yuzva ghari wawar
yfsusen, ysrazvan-
Awar war ytcuren
Izabuqen n yiman.




Yura-t: Mimun Amsbrid (Biljika)
tawiza.net
Paroles