Azwag di izran n Arrif

Azwag di izran n Arrif

Azwag di izran n Arrif

Mammec tesnem, timazighin d imazighen di Yarrif ira qqaren izran, nigh teoyaren izran. Izran a ssawren x wattvasv n ighezdvisen n tudart d imxumbar iteddaren imezdagh n Arrif. Macca deg iseggusa ineggura, izran trahen ad weddvaren, minzi mkur tamghart nigh aryaz itmettan, uca tiri yessen izran; amecnaw ijjet n tdellist ikemdven.
S manaya, rxedmet i din zzat negh nettat ixess anegh ad nesmun marrva min iqqnen..

ghar tussna d idles amazigh, mara nexs ad neddar am neccin am marrva imezdagh n umadval, mahend war ntweddvar, ad nedwer am ubagher yexsen ad yegg ticri n tsekkurt, ghar uneggar tweddvar as ticri nnes.

U zeg ighezdisen i xef ssawaren izran a, ntaf: tayri/aridva, azawar, izran n tesrit d usri, izran n umennugh (Oebdkrim 1921-1926, Muhammed Amezzyan 1908-1912, Franco 1936-1939). Maca nec tira inu ad tiri x izran n uzwag.

Irifiyen am marra imezdagh n umadval, ffghen tamurt nsen arezzun x ureqquz n weghrum, ghar umezwar ira tcarraqen, wis sin tgharraben, wis kradv ssentan zekkûn aman ghar Uruppa; zekkûan x iourar n igharruba ghar timura n barra, am Spanya d Uliman:

Agharrabu n Mritc ikki d rmas rmas

Yusi d ad ioemmar ar Spanya issars


***

Agharrabu n jjdid yuri d aman aman

Ykessi ccababiya ar tmurt n Uliman


Zeg ughezdvis nnidven, ntaf wenni ixedmen deg Uliman yecneo, minzi rxedmet nni war day s bu tamara:

Alimanya rxedmet gi tiri

Wen ssin d yarewhven yewwi d ssedrawi


S manaya ntaf azrawi itettar zeg Uliman ad yarzvem tiwwura nnes i yhvudriyen ad zvwan:

A Yalmanya aya targa n waman

Aya tamennexrut jj ibrighen ad odan


U bnadem mara yeffegh tamurt nnes, itek attvas n iseggusa war d itraggûh:

Tamurt n lxarij a refwah n tteffah

Wen irahen ara din ma oad ad yarewweh


Amezwag ira itejja rwacun nnes d iwehdaniyyen, s manaya ntaf izri ya itettar zzay s ad yemsawadv ak rwacun nnes:

Issek ayi d ssram arr as ssram ines

Ini yas ad yarewweh netta s udvar ines


Deg ughezdvis nnidven, ira yedjis uxariji tasment zzay s tinni war yezvwi babat sent bu waman. X manaya issawaren izran a:

A yedjis n ulimani char zgi temghar

Babam yecca yiref yarnu ra d akidar


Tarr d yedjis n Ulimani tenna:

sst wi qqar roib a yect mi tvencic

Babam mri yezvwa ad taf yecci ten s arric


Deg iyyar a ntaf izran nnedvni tzawaren yenni ira yexsen ad zvwan aman, maca ak uneggar qqimen da:

Svahhit a ddiwana svahhit umi teggid rfarz

Svahhit umi tarrid acewwar ad icarz


***

Svahhit a ddiwana svahhit amen itiri

Svahhit wami tarrid abarrah ar dinni


***

A tesran ttesrihh qeroen imeksawen

Reboadv n yewdan nnekwet war teorimen


Deg umezwar ira Irifien zvekkûan s basbur, zi ssenni teffegh d visa, ak uneggar iban d remrac n recwaghedv. X manaya ssawaren izran a:

Wen tessezvwa temghart ma yetsemma yezvwa

Ggem as tahezzamt ggem as qendura


***

Ibrighen nnegh tghaman teghmart

Thaman ttesrih a ten tessezvwa temghart


Azwag yebdva jar rwacunat ira iteddaren marrva, yebdva jar ihvudriyen d thvudriyin itexsen aya waya, ira yessitimen ad ddaren di taddart d icten, maca agharrabu n zvekku yebdva jar asen.

Qqaren izran di manaya:

Agharrabu n Mritc yekk d rebhar rebhar

Yus id ad ioemmar rebput inem a reomar


***

War dam tsimihegh a tiyara yedvwin

Teksi d llif inu tiwyet i trvumiyyin


***

I wami gha tesrigh llif yudef Aliman

Yudva yi d umettva yescemdv ayi idvudvan


***

Meskin ya llif inu di Pulanda wehdes

Ikessi tittvawin netta d uocir ines


Bettvu ya i yezmen urawen itexsen, yejja tihenjirin sqadant ijdvadv d ireqqasen gha tayri nsen:

A yajdvidv yettvawen mkur ddewla yekk it

Ruh siwedv as ssram i llif mara terq it


***

Ruh siwedv as ssram a tbaghra yettvawen

Llif inu yuyar char rugh d imettvawen


Ar danita takkûdegh ghar uneggaru n tafart-a, ssitmegh ad irin izran a fsusen x urawen nem. Afus g fus timmuzgha afus g fus tanekra.

(amazigh39@yahoo.fr)

N.B. Lire P: h

Source: Oebdlmuttvalib ZIZAWI (tasdawit n Ujda) - tawiza.net Azwag di izran n Arrif
Insert Image
Izran n'Arrif
Azwag di izran n Arrif